Námsmat

Samkvæmt aðalnámskrá framhaldsskóla skal námsmat byggja á margvíslegum námsmatsaðferðum og fela í sér traustar heimildir um hæfni nemenda. Námsmatið á að taka til allra þátta námsins þannig að þekking nemandans, leikni og hæfni auk framfara sé metin. Námsmatsaðferðir geta verið verklegar, munnlegar eða skriflegar, falið í sér sjálfsmat, jafningjamat, símat og lokamat.

Námsmat í Menntaskóla Borgarfjarðar er fyrst og fremst leiðsagnarmat en formleg annarpróf í lok anna eru ekki til staðar. Vinna nemenda er metin jafnóðum allan námstímann. Endurgjöf fer fram á fimm vikna fresti á svokölluðum vörðum en lokaeinkunn áfanga er birt á í lok hverrar annar. Á vörðum er notast við þriggja stiga skala; mjög gott – í lagi – ófullnægjandi, ásamt skriflegum ábendingum frá viðkomandi kennara. Megintilgangur leiðsagnarmats er að gera nemendur meðvitaða um það sem þeir læra, hvernig þeir læra og til hvers er ætlast af þeim. Lokaeinkunn í hverjum áfanga er á formi talna á bilinu 1 – 10 með vísan í námsmarkmið viðkomandi áfanga.

Þar sem ekki verða formleg annarpróf heldur leiðsagnarmat gerir skólinn miklar kröfur til námsmatsaðferða. Einkunnir verða gefnar í heilum tölum á bilinu 1 – 10 eins og um getur í reglugerð menntamálaráðuneytisins.

Einkunn   Markmið
10  u.þ.b.  95 – 100%
9     -  85 – 94%
8     -  75 – 84%
7     -  65 – 74%
6     -  55 – 64%
5     -  45 – 54%
4     -  35 – 44%
3     -  25 – 34%
2     -  15 – 24%
1     –    0 – 14%

Að gefnu tilefni skal þess getið að formleg skrifleg próf eru hluti að ofangreindum matsaðferðum. Til að standast námsmat í áfanga og hafa leyfi til að hefja nám í næsta áfanga þarf lágmarkseinkunnina 5.